Da Matz unn da Hanne kummen
z`rigg ausem Himmel (23)
(Heinz Bernard)
Awwa wie g´sidd die dann aus? Vóóa an dem scheenen Hochalda schdedd enn großa Disch medd Kerzen unn Bluumen unem Buch. Zween Aldääa awwa kään Paschdóóa, käänMessdiena unn kään Leid. Frijja wóóa d´Kirch s´ glään, unn im Hoch-amd hann mindesch-dens 20 Messdiena g´diend. Unn die scheen Kommjoonbang:g? Wenen hadd die dann g´scheead? Wo iss die nua hinnkumm? Wadd soll dann dadd eisanen G´länna? Die wo die aus deja Kirch lóó rausg´holl hann, denen sollen d´Hänn abfellen.Die zween scheena Engeln die wo rechds unn lig:gs uff da Bang:g am Eggen g´schdann horren, sinn aach nimme dòò. Dea wo uff da ling:gs Seid g´schdann hódd, dea horren enn Kelch in da Hand unn hodd d´ Kommjoon ausgedääld, deja uff da anna Seid hodd d´ lin:gen Zeijafinga g´hoof als wenna saan wolld; „ bischd dau ach im Schdande der heilichmachenden Gnade?“ In da rechden Hand hórran Schwäad, als wenna drohen wolld: „Wehe dia, wenn dadd nidd da Fall iss!“ Vóóa deenen horren mia Kinna imma Angschd.
Unn uus scheen Finschdann, wadd iss nua medd deenen passierd? Wadd soll dann lòò? Hadd lóó ääna die Reschda vann seinem Bundglas vaschaffd? Lóó schdeen ma raadlos wisawie, wääsen nidd wadd s´bedeiden sollen. Lóó muss ma jo exdra äänwn hann, fóóa die Deidung s´agläären. Friija hadd doch jeeda gleich g´sinn, dass dadd d´G´buurd Jesu iss, orra edd hl. Abendmahl, orra d´Greizigung. All wóóren s´g´schdiffd vann den reichen Familien, vann Ruppes, vann Niggloosen, vann Jung:gmanns, Schwinns unn wie s´all hää-schen.
Aah, luu mòòl lòò, die Kanzel iss jo noch dóó. Awwa kääna b´nudsd s´noch? Iss die so baufällich, dass ma Angschd hadd, s´gääf s´sam-menbrechen, orra isen da Wech s´weid vam Aldaar aus bis zua Kanzel?
Heinz Bernard
