24.Uus Wudds wiad g`schlachd
(Heinz Bernard)
Imm Winda, edd hadd jo mißden kald sinn, weil ma noch kään Tiefkiildruu hodd, iß awwa ach ään vann deen schennschden Ää:awedden g´schaffd wo:ad, edd Wuds iß g´schlachd wo:ad. Dadd wo:a imma enn grooßa Feschd:daach. Se hann emm Jungmann Pidd, emm Vo:aschdeja, orramm Schnuu:asch Hannes, emm Hird, dadd wo:aren die Medsgää:an vo:a Haus:schlachdungen se machen, B´schääd g´saad, dassed so weid iß. Da Pidd hadd sein Messann g´weddsd unn de Aggsd orra de Schleejel, medd deem wo mamm Schwein uff de Schdija g´schlaa hadd, noog´luud. Dann harra sein ganz G´milldadds inn de holzenen Muul g´leed, die uff de Ziiwäänchin g´laad unn bei Lessels g´faa. Wenned Schwein dann g´schlaa, g´schdoch, rasijadd unn ausg´holl wo:a, dann issedd memm Sillschääd ann da Lääda uffg´hong:g wo:ad, woo edd dann memm G´ling ään zween Daa häng:gen bliif iß. Edd G´därm iß aanschdennich g´reinichd wo:ad, weil madd vo:a de Wurschd g´brauchd hadd. Vann da Blooß hann de Kinna sich enn Fußball g´mach, orra da Ooba hadd sich enn nau:en Tuwaggsbeidel davaan g´mach. Zween Daa schbääda wo:a da Wurschd:daach. Da Pidd harredd Schwein ausenanna g´schnied in Vorra- unn Hinnasching:gen, Schbeggseiden, Kudleddenschdigga, Kobb unn Fiiß. Die Schdigga sinn g´sollbadd wo:ad, inn de Sollbabidd g´leed, nommool medd Pegelsdalz iwwaschdrau:du unn medd Wassa iwwagoß wo:ad. De Sching:gen hann vija bis finf Wuchen, unn die anna Schdigga zwoo drei Wuchen imm Sollba g´lee. Daach däächlich iß medd da Boll de Sollbabrii iwwad Fläsch g´schudd wo:ad. Faschd all Dääla vamm Schwein sinn vaschaffd wo:ad: de Dreibenfo:a de Wurschd innsefillen, edd G´ling, de Ooren, de Fiiß unn da Kobb fo:a Wurschd unn Schweinskääs, edd Fedd fo:a Schmalz unn Griiwen, edd Schmalz fo:a de Kuddledden inn Glässa orra Dibba innsemachen orra fo:a uwedd Brood. De Bluud- unn Lewwawirschdcha sinn gudd g´kochd, uff Schdangen uffg´hong:g unn dann endwedda g´druggd orra im Rauch:haus, woo de Dreibenwurschd orra Aanduddeln, wie se aach noch g´hääschd hann, schunn g´hong:g hadd, g´rauchd wo:ad. Schbääda sinn dann de Sching:gen noch dazuu kummVann deja Brii, woo de Wurschd drinn g´kochd wo:ad iß, iß amm näggschden Daach Wurschdsubb g´kochd wo:ad. Doo hadd de ganz Famill, de Noobaschafd unn de Freindschafd ija Dääl davvan griid. Edd wo:a wie g´saad enn „Schladfeschd“.
Heinz Bernard
