5. Im G´dingloon
(Heinz Bernard)
G´nau:u soo froo wie ma iwwa de Hilf vann den aarmen Pää:a wo:a, g´nau:u so froo wooren ma ach, daß ma schunn als Schlebba medd inn de G`dingeloon gang sinn. Zu:a Zeid vann seinem Pabben hann die mißden imm Schichdloon schaffen, de:a iß vann da Direggdsjoon feschdg´leed wo:ad. Da G´dingeloon iss ausg´handeld, „ausgedung“ wo:ad, de:a iss braggdisch vaschda:id woad. Jee noo deem wie de Vahälldnissa wo:aren, obb edd enn hoo:a orran niddrija Schdollen wo:a, obbed vo:a Ord naß orra heiß wo:a, had da Kamm-raadschafdsällschda, da Padiimann orra da Driddelfiira de Loon ausg´handeld. Allen drei Määnd iss vadingd wo:ad. Moins noom Valeesen, de Aanwesenhedd vann de Berchleid iß feschdg´schdelld wo:ad, issed imm Saal gans ru:ich woad. De Padiileid durfden drei bis vi:a Mann aussuchen, doo hannse nadi:alich g´luud, dasse i:a Kumbels bei sich hodden, die reschdlichen vi:a Mann hadd de Vawalldung g´schdelld. Die woo nidd g´wääld wo:ad sinn, die woo iwwrich bliif sinn, hann mißden fo:a drei Määnd doohin geen woo de Ää:awedd amm schlimmschden wo:a, die hodd nadi:alich kääna g´schda:id. Dann issedd nommool ru:ich wo:ad imm Valeesesaal, de Vadingung iss lossgang. Da Owwaschdei:a hadd ään Ää:awedd uffg´ruuf: Waalschiida Fleez, Bremsberch zwoo, Oschd, daa Waan vo:a zwellf Groschen. Die Wään horren zehn Zendna. Unn jedds hann die Partiileid vann zwellf Groschen aan runnag´bood. Imm Schnidd iss dann soon Waan fo:a fünf bis seggs Groschen furdgang. Ee dass se dann inng´faa sinn, hann de Berchleid i:a Kabb orra i:aren Filzhuud – enn Helm harred jo noch nidd ginn - vamm Kobb g´holl unn hann g´beed. Dannoo ißedd dann runna inn de „Hell“, we:a wääs fo:a wie lang. „Hoffentlich kumm ich nommool hääl raus“ hadd jeeda g´dengd. Ääna vann deen Schlebbann orra da Lee:ahau:ua, graad de:a woo schreiwen kunnd hodd, hadd uff de Wään vann da Paddii medd Greid edd Za:ichen vann da Paddii unn de laufend Numma g´schriif. Da Uffkerba, so hodd ma deenen g´nannd, de:a woo all voll Wään fo:a jeed Kammraadschafd uffg´schriif hadd, dadd hadd mißden ääna sinn, uff deenen sich da Schdeija hadd kinnden hunnadbrozendich valossen. Amm Enn vann da Schichd iss dann edd Ergebnis uff enn grooß Tafel imm Valeesesaal g´schriif wo:ad. Doodanoo iss dann da Loon b´rechd wo:ad.
Heinz Bernard
